ភ្នំពេញ៖ រដ្ឋមន្ត្រីសាធារណការលោកទេសរដ្ឋមន្ត្រី ស៊ុន ចាន់ថុល បានឱ្យដឹងថាបច្ចុប្បន្នមានអ្នកប្រើប្រាស់យានយន្តចំនួន ៣៤៩ ០០០ នាក់ដែលកំពុងកាន់ប័ណ្ណបើកបរដែលផុតសពុលភាព។ លោកបានជំរុញដល់អ្នកទាំងនោះឱ្យមកដាក់ពាក្យស្នើសុំបន្តសពុលភាពឡើងវិញនៅតាមកន្លែងផ្ដល់សេវាសាធារណរបស់ក្រសួង។

ថ្លែងក្នុងពីធីសម្ពោធដាក់ប្រើប្រាស់ជាផ្លូវការស្ថានីយត្រួតពិនិត្យយានយន្តសំរោងអណ្ដែត ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ព្រឹកថ្ងៃទី២១ ខែមេសា ឆ្នាំ២០២៣នេះ លោក ស៊ុន ចាន់ថុល បានអំពាវនាវដល់អ្នកដែលប្រើប្រាស់ប័ណ្ណបើកបរហួសសពុលភាពទាំងអស់ទៅបន្តសពុលភាពឡើងវិញ និងកុំប្រើប្រាស់ឈ្មួញកណ្ដាល។

លោកថា៖ «នៅពេលដែលនគរបាលលោកចាប់ត្រួតពិនិត្យ យើងថាគេត្រួតពិនិត្យចង់បានថវិកា មិនមែនទេ! គឺគេធ្វើតាមច្បាប់ ។ ច្បាប់ចង្អុលបង្ហាញថាអ្នកបើកបរត្រូវយកប័ណ្ណបើកបរមកបន្តសពុលភាពបើវាផុតកំណត់សពុលភាព។ នេះជាច្បាប់ហើយការផាកពិន័យនោះមិនមែនជាការផាកដោយនគរបាលលោកចង់ធ្វើទេ គឺដោយសារច្បាប់ចង្អុលបង្ហាញ»។

លោករដ្ឋមន្ត្រីបានលើកឡើងថាបញ្ហាគ្រោះថ្នាក់ចរាចរណ៍នៅតែជាបញ្ហាមួយដែលរដ្ឋាភិបាលព្រួយបារម្ភដោយថាភាគច្រើនកើតឡើងពីបញ្ហាមនុស្សតែម្ដង។ លោកធ្លាប់ឱ្យដឹងថាគ្រោះថ្នាក់ចរាចរណ៍នៅកម្ពុជាក្នុងមួយថ្ងៃជាមធ្យមបានសម្លាប់មនុស្ស៥នាក់ ដែលស្នើនឹង១៥០នាក់ក្នុង១ខែ ខណៈធ្វើឱ្យខាតបង់ថវិកាជាតិប្រមាណ ៤៥០លានដុល្លារអាមេរិកក្នុងមួយឆ្នាំ៕